Maqolaning nomida ancha qat'iy ruhda yozilgan. Nega? Birinchidan, kamina madridistman va "oqlar"ga ishonaman! Ikkinchidan, myunxenliklarning bu mavsumdagi o'yinlari shunday fikr yuritishga majbur etadi. Bu "Bayern" o'tgan mavsumdagisiga o'xshamaydi, undan kuchli emas! Qirollar esa aksincha!

Buning uchun ortda qolgan kichik tarixiy yo'lga nazar tashlaymiz... To'g'ri, "Bayern" Bundesligani hal etdi, raqobat esa "0"ga teng. Lekin, juda o'tkir, mustahkam hujumkor falsafaga ega bo'lgan sobiq Jupp Haynces jamoasi Pep boshqaruvida to'p nazoratiga katta e'tibor qila boshladi. Birinchi to'qnashuvda katta ustunlikka ega myunxenliklarni Ancelotti shogirdlari qarshi hujum evaziga mag'lub etdi! Bavarlar esa nisbatan sust harakat qildi.

Boshqa tomondan olganda, myunxenliklar safida jahonning eng kuchli pleymeykeri va nominal hujumchisi amalda yo'q. Bu ikki pozitsiya har qanday o'yinda ulkan rol o'ynaydi. Bu fikrni qaysidir ma'noda tayanch yarim himoyasi haqida ham gapirish mumkin. "Real"da esa har bir pozitsiyada yetarlicha qudratga ega futbolchilar mavjud. Bavarlar safida esa himoya va darvozabon haqida faqat maqtovli so'zlar aytish kerak!

Nemis klubi uchun so'nggi taqvim biroz qiyin kechdi. Dortmundliklarning ular ustidan qozongan g'alabasi ozmi-ko'pmi "qizillar"ni ruhan sindirdi. Bu fikrni Chempionlar ligasi tomon ko'chirib o'tsak nimani ko'rishimiz mumkin? Bu bosqichgacha nemislar qanday yetib keldi? Aytish mumkinki, ularga shunchaki oson bo'lmadi! Masalan...

Guruh bosqichida "Bayern" o'z uyida "Manchester City"dan alamli mag'lubiyat qabul qilib oldi. Safarda esa madridliklar nega g'alaba bilan qaytishi mumkin emas ekan? "Shaharliklar"dan Qirol jamoasi ustun bo'lsa ustunki, ammo kam emas, to'g'rimi!?

1/8 finalda nemis klubiga omad kulib boqdi. "Arsenal" biroz ishi yurishganda yoki alamli taqdir o'yini bo'lmaganda, ular keyingi bosqichga chiqa olishga haqli edilar. Ozilning amalga oshira bilmagan penaltisi, Wojciech Szczęsnyning chetlatilishi bunga yaqol sababku! "Allianz Arena"dagi durrang (1:1) esa Myunxenni to'xtatish imkoni borligini ko'rsatdi.

Keyingi bosqichda sal bo'lmasa, "Manchester United" bu mavsum ancha kuchsizlanganiga qaramay, "Bayern"ni yengishiga bir bahya qoldi. "Old Trafford"dagi durrang (1:1) bunga misol. Moyes qo'lostida og'ir damlarni o'tkazayotgan jamoa shunday natija qayd etganda nega tajovuzkor va tartibli o'yin ko'rsatayotgan "Real Madrid"ning finalga chiqishi mavhum ekan? Albatta unday emas. Qirollik klubi albatta finalga yo'l oladi va barchamizni xushnud etadi! Biz shundan umidvormiz, nasib qilsa Lissabonga yo'l biz uchun ochiladi!

www.real-madrid.uz

Fenómeno