Assalomu aleykum madridistlar! Bilaman, barchaningizni bugungi kuningiz ajoyib o'tmoqda. "Real Madrid" ko'chalarida bayram, jamoa mavsumdagi birinchi kubokni zabt etdi!

Va nihoyat klasikolarga ba'gishlangan maqolamni davom ettirmoqchiman. "Bir piyola "Barca" choy ustida" deb nomlangan maqolamning uchinchi soni sayt yuzini ko'rmoqda. Saytda uzoq vaqtdan buyon muxlislik qilib kelayotgan foydalanuvchilar bu maqolaning avvalgi sonlarini o'qib ko'rishgan. Unda bo'lib o'tgan "el clasico" haqida muhokama ketadi... Unda raqib ustidan noo'rin muhokama ketmaydi! Shunchaki unda ikki raqib haqida fikr almashamiz!

Kecha Ispaniya kubogi "Mestalla" stadioniga yetib kelganligi haqida kiritilgan xabarda "Real Madrid"ning bu mavsumdagi "Barcelona"ga 2 bor mag'lub bo'lganligi va 3-si qaytarilmasligini aytib o'tgan edim. Chunki Qirollik klubining qanchalik mas'uliyat va kuch-g'ayrat bilan maydonga chiqib kelishi va kataloniyaliklarni mag'lub qilishga qodir ekanligiga butun vujudim bilan ishondim! Siz ham albatta...

Uchrashuv juda qiziqarli, keskin va yorqin voqealarga boy bo'ldi. Tan olish kerak, har ikki jamoa ham dunyo futbol ishtiyoqmandlariga oldindan sahnalashtirilmagan, biroq "super tomosha" namoyish etdi. Sir emas, har ikki jamoa muxlislari, siz-u biz o'yinni tinchlanib ko'ra olmadik, chunki o'yinning harorati bunga yo'l bermadi. "Real" ham, "Barca" ham imkoniyatlarga ega bo'ldi, ammo keling, bu o'yinda biz kuchliroq edik deya ovoza qilaylik!

O'yinni kuzatish oson bo'lmadi, shaxsan kamina asabiy holatlarga ham uchradim, Bale va Benzemaning ajoyib imkoniyatlarni yo'qqa chiqarishi, finalda katta yo'qotishlarga sabab bo'lishi mumkinligini siz qatori bilib turgandim. Mark Bartra esa ana shu narsani isbot qildi. Biroq, madridliklar psixologik tomondan muvozanatni tenglashtirigan jamoaga qarshi mustahkam iroda, o'ziga xos xarakter namoyish eta oldi. "Qaymoqranglilar" safida Pepe, Ramos, di Maria, Iscolarning o'rni beqiyos bo'ldi. Bale esa 8 yillik faoliyatidagi ikkinchi kubokni olib keluvchi golni kiritdi va barchaga transfer summasi bejizga sarflanmaganligini isbotladi. Kim ham ishonibdi deysiz, Bale gol kiritishdan oldin fantastik "kross" oladi deb. Bu individual mahorat evaziga jamoani g'alabaga yetaklash edi, qolaversa Bale Cristiano Ronaldoning nuqtasida unga munosib voris bo'lib turish hissini ham tuygan edi. U o'zini yetakchilar qatoriga qo'shib qo'ydi!

Angel haqida ko'p gapirish noo'rin. Shunchaki 5! "Lapsha" klasikoda odatdagidek istalgancha raqsga tushdi, "master klass" ko'rsatdi. Gol urdi, ba'zi qarshi tomon fikrlari bo'yicha u hech qanday o'yindan tashqari holatda emasdi, Benzema to'pni uzatganda, hatto "Barca" futbolchisidan bir qarich ortda ham edi.

Raqib tomonda kimlar kuchli o'ynadi? Bular Pinto, Xavi, Iniesta va gol urib keyichalik Baleni o'tkazib yuborgan Bartra bo'ldi.

O'yindagi statistika qanaqa? To'pga egalik qilish bo'yicha mezbon sifatida o'yinni boshlagan "Barca" odatdagidek oldinda 65-35%, zarbalar 12-18, offsayd 5-1, burchak to'plari 7-5, follar 5-8, kartochkalar. Ko'rinib turganidek, "Real Madrid" to'pga kamroq egalik qilib, ko'proq hujum qildi. Biz Jose Mourinhodan meros qolgan qarshi hujum va Ancelotticha taktikaning qorishmasini ko'rdik. Masalliq esa ajoyib chiqdi ))).

Kubokni qo'lga kiritish bo'yicha "Barca" oldinda (26), "Real" esa "Atletico" (23)dan keyin uchinchi o'rinda (19). 

Ikki klasikodagi mag'lubiyatga Madrid munosib bo'lmaganligini isbotladi. Mateu Lahos o'yinni yaxshi boshqardi, uni buzmadi, o'yin haroratini sezdi, hisobga oldi, jamoalarga imkon berdi, inglizcha futbol metodi Ispaniyaga kirib kelgandek bo'ldi. "Barcelona" davri tugagan, yo'q, ular har doim kuchli raqibligicha qolaveradi!

Mana, barchamizning yuzimiz yorug'. Raqib va uning muxlislarini mensimaslik va ustidan "qotish"ning keragi yo'q. Ularni hurmat qilib, omad tilaymizda, g'alabani nishonlashda davom etamiz. Muxlislar Madrid yoki Kataloniya klubiga ishqibozlik qilgani uchun aybdor emas. Raqibga ajoyib kurash uchun tashakkur aytamiz, jamoani esa qo'llab-quvvatlashdan to'xtamaymiz!

iHala Madrid! 

www.real-madrid.uz

Fenómeno