"Real Madrid" va nihoyat 12 yillik orzuni amalga oshirdi, 12 yil intizorlik bilan kutilgan kubokni zabt etdi, 12 yillik omadsizlikka barham berdi. O'yinda u yoki bu o'yinchini alohida qahramon deyishni istamasdim, butun jamoa o'yinni yetakladi, barcha futbolchilar bir-birini to'ldirdi... Jamoa 90 daqiqa gol urmadi. Ularga 15 daqiqa kerak bo'ldi xolos. Hammasi 93' daqiqada boshlandi, qolgani esa qo'shimcha bo'limning ikkinchi yarmida hal bo'ldi!

Ancelotti va Zidane

Bu ikki mutaxassis huddi qadrdon aka-uka singari kelishib faoliyat ko'rsatdi. Mavsum davomida ular hamda futbolchilar o'rtasida hech qanday kelishmovchiliklarni kuzatmadik. Papa Carlo jamoaga yangicha uslub qo'shdi, eng muhim omil - xotirjamlik olib kirdi, futbolchilarni har qanday vaziyatda qo'lladi, ularni maydonga almashlab o'ynatishni joriy etib, butun jamoada qoniqish hosil qildi. Zidane esa mashg'ulotlarda futbolchilar bilan tengma-teng shug'ullandi, o'z malakasini baham ko'rdi va ularni og'ir kunlarda ham qo'llab-quvvatladi.

Iker Casillas

Biz uchun dunyoning eng kuchli darvozaboni Diego Godinning golida juda qo'pol xatolikka yo'l qo'ydi. Keling, buni aybga yo'ymaylik. Taqdir shuni taqozo etibdimi, undan qochib bo'lmaydi. Uning aybini esa boshqa bir futbolchi tuzatib qo'ydi. Iker kecha 12 ta uzatmadan 10 tasini aniq amalga oshirdi. Courtois esa umumiy uzatmalarining faqat 27%nigina manziliga aniq yetkazdi, bu finaldagi eng yomon natija edi!

Sergio Ramos

Ramosga shunchaki "mega respect"! Bilasizmi, ishonchim komil, Segioning mavsum oxiridagi o'yinlarini hali hech qaysi himoyachi qayd eta olmagan. Bunda uning gollari, uzatmalari va himoyadagi ishonchli o'yinida nazarda tutilmoqda. Ramos madridliklar tarkibida so'nggi 7 uchrashuvda eng ko'p gol urgan futbolchidir. Bu uchrashuvlarda juda muhim bo'lgan 6 ta golni kiritdi. Kamaslik futbolchi uchrashuvda eng ko'p - 102 ta uzatma berdi. 7 marta raqibni to'psiz qoldirdi. O'yin taqdiri xunuk yakun topaman degan pallada 93'da o'yinni fantastik kinoga aylantirib yubordi!

Gareth Bale

Aftidan, Bale kecha birinchi finali bo'lganligi uchun ham xayajonga berildi. O'yinlari og'ir va biroz ishonchsizdek edi. Eng ko'p golli vaziyat unda bo'ldi. Uelslik naqd 3 ta ajoyib imkoniyatni ko'kka sovurdi. Ayrim muxlislar 100 mln yevrolik xarajatni eslab turganida, g'alaba golini boshlab berdi. U orzusiga erishdi.

Di Maria

Di Maria golli uzatma bermadi, gol urmadi, lekin o'yindagi fartopianoni chalgan ijrochi aynan Angel edi. Angel "Real Madrid" farishtasiga aylandi. Tan olaylik, u o'yinda eng yorqin harakat qildi. Shu sababki o'yinning eng yaxshisi deb tan olindi va bu sovrinni Fergusson qo'llaridan qabul qilib oldi. Uning o'zi butun "Atletico" futbolchilariga qaraganda raqiblarni ko'p alday oldi. U bu ishni 6 marta amalga oshirdi. Ketma-ket reydlari bilan barchani lol qoldirdi. U maydondagi betakror raqqosga aylandi!

Cristiano Ronaldo

Ronaldoda jarohat alomati borligini menimcha barcha fahmlay oldi, biroq bu so'nggi, hayot-mamot jangi edi va shu sababli portugaliyalik bu finalni barvaqt tugatmadi. Uning o'yinlari qovushmadi. Biroq 17 gol bilan Chempionlar ligasi tarixida mutlaq rekord sohibining bu finalgacha xizmatlari nihoyatda katta. To'g'ri, u yuqori formada o'ynamadi, lekin o'ylab ko'ring, u maydonga bo'lmaganda-chi? "Real"da jamoaga yengilmas ruhiyat olib kiradigan ikki futbolchi bor - biri Iker, ikkinchisi aynan Ronaldo! CR7 barcha qatori 10-kubokni uzoq kutdi va uni yutishga nihoyat erishdi. Ikki jamoada ("MU" va "Real") bir xil sovrinlarni yuta olgan yorqin yulduzga aylandi. Endi unga faqat Jahon chempionati kubogi yetishmayapti...

Marcelo va Coentrao

Fabio o'z pozitsiyasida yaxshi harakat qildi, qo'pol xatolar qilmadi, Marceloning maydonga tushishi shunchaki hujumkorlikni oshirish uchun qilingan pozitsion almashtirish edi va Mars buni epladi. U o'z golini ko'z yoshlari bilan qarshi oldi, chunki "Madrid" bu goldan so'ng 100% g'alabani kafolatlab qo'ygan edi.

Pepe, Alonso, Jese

Ular maydon chetida jamoaga yordam bera olmasligini bilib, chuqur qayg'uga botgandek edi. Ayniqsa, o'yin yakunlanayotgan vaqtda jamoada imkoniyatlar bo'lib, ulardan foydalana olmayotganda ular hammadan ham ko'p hissiy "potlash"larga berildi. Ular finalgacha jamoani yetakladi, final ularsiz o'tsa-da, ular bu sovringa munosib edi.

Varane

Diego Simeone bilan uning tortishuvini ko'rib xayron qolish mumkin. Rafa ancha ulg'ayibdi ). Shubhasiz, Pepe finalda o'ynamaydi degan xabar chiqqanda, siz-u biz Varanening tajribasizlik qilib qo'yishidan juda xavotirda edik, Varane esa unday emasligini isbotladi, ikkinchi qavatda u raqiblariga non ham, uvog'ini ham qoldirmadi!

Carvajal

U Arbeloaga juda mos voris! Dani o'ng qanot qiroliga aylanmoqda. Yosh bo'lishiga qaramay, u ham hujumda, ham himoyada tinmay ter to'kdi, yo'l qo'ygan ayrim xatolarini o'zi tuzatishga ham ulgurdi.

Khedira

Bir qarashda Samining maydonga tushishi mantiqqa to'g'ri kelmasdi. Chunki "nemis tanki" hali formaga qaytmagandi. Simeone jamoasini Asier Illarramendiga bosim o'tkazishga o'rgatdi, chunki Ancelotti Illarrani finalda Alonso o'rniga qo'yishini aytgan edi. Biroq o'yin boshlanishiga 1 soat qolganda Carlo Samini maydonga qo'yib yubordi. Bu aldamchi taktika bo'lsa ne ajab?

Modric

U haqda ko'p yozmayman, shunchaki ilgari unga bag'ishlangan yangiligimdagi ta'rifni qayta eslatmoqchiman. U jamoadagi "oq tanli qora mehnatkash"dir! Maydon markazidagi zanjir so'zsiz xorvat xavbeki edi.

Isco

Murabbiy jamoa mag'lub bo'layotgan vaqtda hujumni Isco va Marcelolar evaziga kuchaytirmoqchi bo'ldi. Ikki futbolchining paydo bo'lishi bu rejani oqladi, ular raqibni "kvadrat" uslubida ancha qiynab qo'ydi. Isco ancha yaxshi harakat qildi.

Benzema va Morata

Karim borasida butun madridistlarni salbiy fikrlamaslikka chaqirardim! Uning maydondagi mehnati juda ulkan. U odatdagidek o'zini faqat hujumchi deb bilmadi. Maydonning barcha chiziqlarida jamoasiga yordamlashdi. Benzema jismonan 100% tayyor bo'lmasa-da, imkon qadar jon "kuydirdi". Alvaroda tajriba yetishmasligi kundek ravshan, lekin yosh hujumchi maydonga tushishi bilan, nominal forvard paydo bo'lganligini ko'rdik. Morata jamoaning hujumiga yangicha kuch qo'shdi!

Muxlislar

Muxlislarning qo'llab-quvvatlashini ko'rib, xayratga tushish hech gap emas. Butun stadion go'yo qo'shiq kuylar edi. "Decima"ning sog'inchida ana shu kechadagina chin dildan his qilish mumkin edi. Ronaldo Ona yurtida muxlislarni jonlanishga chaqirdi, bu esa g'alabaga yana bitta qo'shimcha kuch bahshida etdi!

Tashakkurnoma!

Tashakkurnoma "Atletico" va uning ajoyib murabbiy Diego Simeonega bag'ishlanadi. Biz argentinalik mutaxassis va uning jangchi futbolchilariga butun mavsumdagi qahramonliklari va ajoyib finaldagi tengma-teng bahslari uchun minnatdorchilik bildiramiz. Ular hurmatga loyiq, ular mag'lubiyatga uchragan g'oliblardir!

www.real-madrid.uz

Fenómeno